Nga Redaksia –Një skandal i ri ka shpërthyer në Shtetet e Bashkuara, duke goditur drejtpërdrejt strukturën e hetimeve të drejtuara nga ish-prokurori special Jack Smith kundër Presidentit Donald Trump. Departamenti Amerikan i Drejtësisë ka ngritur aktakuzë penale ndaj ish-prokurores federale Carmen Mercedes Lineberger, e cila akuzohet për vjedhje dhe fshehje të dokumenteve konfidenciale që lidhen me hetimin për dokumentet e klasifikuara të Trump.
Sipas dokumenteve zyrtare të publikuara nga autoritetet amerikane, Lineberger, 62 vjeç, ish-Managing Assistant U.S. Attorney në Distriktin Jugor të Floridës, dyshohet se ka marrë në mënyrë të paligjshme materiale sekrete të lidhura me raportin e përgatitur nga Jack Smith për çështjen e dokumenteve të klasifikuara të Donald Trump.
Hetuesit federalë pretendojnë se ajo i ka dërguar vetes në email personal dokumentet sekrete dhe ka tentuar t’i fshehë duke ndryshuar emrat e skedarëve në mënyrë të pazakontë si “Bundt_Cake_Recipe.pdf” dhe “Chocolate_cake_recipe.pdf”, për të shmangur zbulimin.
Aktakuza përfshin katër akuza penale, ndër to:
- vjedhje të pronës qeveritare,
- fshehje të dokumenteve publike,
- manipulim të regjistrave federalë,
- dhe transferim të paautorizuar të materialeve konfidenciale.
Skandali ka ndezur menjëherë reagime të forta në kampin konservator amerikan. Ish-ambasadori Richard Grenell reagoi publikisht në rrjetin X duke kërkuar hetim të plotë për të gjithë zinxhirin e njerëzve të lidhur me operacionet e Jack Smith kundër Trump. Ndërkohë, shumë analistë pranë republikanëve po e konsiderojnë këtë zhvillim si një tjetër provë se hetimet ndaj Trump kanë qenë të mbushura me shkelje procedurale dhe manipulime politike.
Raporti sekret i Jack Smith mbi dokumentet e klasifikuara nuk është publikuar kurrë zyrtarisht, pasi gjyqtarja federale Aileen Cannon urdhëroi bllokimin e tij dhe ndaloi shpërndarjen publike të materialeve. Pikërisht ky raport është në qendër të akuzave ndaj ish-prokurores federale.
Ngjarja ka rikthyer debatet e mëdha në SHBA mbi përdorimin politik të drejtësisë federale gjatë viteve të fundit, sidomos në rastet që lidhen me Donald Trump. Për kritikët e establishmentit amerikan, ky skandal ngre pikëpyetje serioze mbi mënyrën se si janë ndërtuar dhe administruar hetimet më të bujshme politike të dekadës.
Ndalohet kopjimi pa lejen e portalit PatriotikMedia.al. Ky material është i mbrojtur sipas ligjit nr. 35/2016 për të drejtën e autorit dhe të drejtat e lidhura me të.